Ludwig IV. (HRR)

Dr Ludwig IV. (bekannt as Ludwig dr Bayer; * 1282 oder 1286 z Münche; † 11. Oktober 1347 z Puch bi Fürstefäldbrugg) us em Huus Wittelsbach isch vo 1314 aa dr röömisch-dütsch Köönig und ab 1328 dr Kaiser vom Häilige Röömische Riich gsi.

Noch em Dood vom Kaiser Heinrich VII. si im röömisch-dütsche Riich im Joor 1314 mit em Wittelsbacher Ludwig und em Habsburger Friidrich zwäi Köönig gweelt und kröönt word. Dr Kampf um e Droon het meereri Joor duurt und in dr Schlacht bi Müüldorf 1322 e Vorentschäidig für die wittelsbachischi Site gfunde. Mit em Münchner Verdraag vo 13 isch für e Zitli e Dobbelköönigdum festgläit worde, was im middelalterlige Riich völlig umbekannt gsi isch, und Usenandersetzig beändet. Wo dr Ludwig sich in Norditaalie iigmischt het, het er e Komflikt mit em Bapstdum aagfange, wo en fast si gsamti Herschaftszit, vo 1323/24 bis zu sim Dood 1347 beschäfdigt het. Dr Wittelsbacher isch 1324 exkommuniziert worde und isch bis zu sim Dood im Chillebann bliibe. Wääred em Komflikt mit dr Kurie het sich d Riichsverfassig in e sekulaari Richdig entwigglet. Im Joor 1328 het e „bapstfreiji“ Kaiserchröönig stattgfunde, wo dr Ludwig d Kaiserchroone vom röömische Volk üüberchoo het. Dr Ludwig isch dr erst Wittelsbacher gsi, wo röömisch-dütsche Kaiser worde isch. Im 14. Joorhundert häi em kuriaali Kwelle um e Bapst ume dr Schlötterlig „dr Bayer“ (Bavarus) aaghänggt. Vo de 1330er Joor aa het dr Ludwig si Huusmachtpolitik intensiwiert und mit Niiderbayre und em Tirool groossi Gebiet erworbe. Dr Usbau vo sinere Herrschaft isch aber au gföörlig für d Konsensherrschaft mit de Fürste as wääsentligs Herrschaftsmuster vom 14. Joorhundert gsi. Wäge dene Spannige im Gliichgwicht zwüsche de Fürste und em Kaiser isch 1346 dr Karl IV. as Geegeköönig gweelt worde. Ludwig isch immer no im Chillebann gsi, won er 1347 gstorbe isch.